Category: செய்திகள்

2021 ஆம் ஆண்டுக்கான வரவு – செலவுத் திட்டம் 97 மேலதிக வாக்குகளால் நாடாளுமன்றில் இன்று (10) நிறைவேறியது. வரவு – செலவுத் திட்டத்தின் மூன்றாம் வாசிப்பு மீதான வாக்கெடுப்பின் போது ஆதரவாக 151 வாக்குகளும், எதிராக 54 வாக்குகளும் அளிக்கப்பட்டன. தமிழ் தேசியக் கூட்டமைப்பைச் சேர்ந்த நாடாளுமன்ற உறுப்பினர்கள் வாக்கெடுப்பில் பங்கேற்கவில்லை.

மத்திய உள்துறை அமைச்சர் அமித் ஷாவை விவசாயிகள் சங்கத் தலைவர்கள் டில்லியில் (செவ்வாய்க்கிழமை)நேற்று இரவு 8மணியளவில் சந்தித்துப் பேச்சு நடத்தினர். இந்தப் பேச்சுவார்த்தையில் முக்கிய முன்னேற்றம் எதுவும் ஏற்படவில்லை.

சிங்குவில் கடந்த 13 நாள்களாக தொடரும் விவசாயிகள் பேராட்டத்தை
முடிவுக்கு கொண்டுவர மத்திய அமைச்சர்கள் விவசாயிகளுடன் நடத்திய அடுத்தடுத்த பேச்சுவார்த்தைகள் தோல்வியில் முடிவடைந்த நிலையில், பிரதமர் நரேந்திர மோடி தலைமையில் புதன்கிழமை மத்திய அமைச்சரவைக் கூட்டம் நடைபெறுகிறது.

நெடுஞ்சாலைகள் போக்குவரத்து அமைச்சு மீதான குழுநிலை விவாதத்தில் நேற்று (08) கலந்துக்கொண்டு உரையாற்றிய தமிழ்த் தேசியக் கூட்டமைப்பின் நாடாளுமன்ற உறுப்பினர் தவராசா கலையரசன், அரசாங்கத்தின் ஒரு கிலோமீற்றர் பாதை அபிவிருத்தி வேலைத்திட்டத்தின் கீழ், அம்பாறை மாவட்டத்தில் ஒரு கிலோமீற்றர் பாதைக்குகூட செப்பனிடப்படவில்லை எனக் குற்றஞ்சுமத்தினார்.

அகில இந்திய விவசாயிகள் போராட்ட ஒருங்கிணைப்புக் குழுவின் சார்பில் டிசம்பர் 14-ம் தேதி முதல் அனைத்து மாவட்ட ஆட்சியர் அலுவலகங்கள் முன்பாக தொடர் காத்திருப்பு போராட்டம் நடைபெறும். இப்போராட்டத்தில் விவசாயிகள் பெருந்திரளாகப் பங்கேற்பர் என்று தமிழ்நாடு விவசாயிகள் சங்கம் தெரிவித்துள்ளது.

வேளாண் சட்டங்களுக்கு எதிராக விவசாயிகள் நாளை நடத்தும் பாரத் பந்த்தின்போது அசம்பாவிதங்கள் ஏதும் நடக்காமல் தடுக்க பாதுகாப்பை பலப்படுத்துங்கள். அமைதியை உறுதி செய்யுங்கள் என்று மாநில அரசுகளையும், யூனியன் பிரதேசங்களையும் மத்திய உள்துறை அமைச்சகம் கேட்டுக்கொண்டுள்ளது.

வேளாண் சட்டங்களுக்கு எதிராக விவசாயிகள் நடத்தும் போராட்டத்துக்கு ஆதரவாக, தடகள வீரர்கள் தாங்கள் பெற்ற பதக்கங்கள், விருதுகளைத் திருப்பி அளிக்க குடியரசுத் தலைவர் மாளிகையை நோக்கிச் சென்றபோது போலீஸார் அவர்களைத் தடுத்து நிறுத்தி திருப்பி அனுப்பினர்.

குவைத்தில் நேற்று முன்தினம் நடைபெற்ற நாடாளுமன்றத் தேர்தல்களில் ஏறத்தாழ அரைவாசி ஆசனங்களை எதிரணி பெற்றுள்ளது. அரச தொலைக்காட்சியில் தேர்தல் ஆணைக்குழுவால் நேற்று அறிவிக்கப்பட்ட முடிவுகளின்படி, கடந்த நாடாளுமன்றத்தில் 16 ஆசனங்களைக் கொண்டிருந்த எதிரணியைச் சேர்ந்த வேட்பாளர்கள் அல்லது எதிரணியை நோக்கிய வேட்பாளர்கள், 50 ஆசனங்களைக் கொண்ட தேசிய சட்டசபையில் இம்முறை 24 ஆசனங்களைப் பெற்றுள்ளனர். எவ்வாறெனினும் இத்தேர்தலில் 29 பெண்கள் போட்டியிட்டபோதும் எவரும் வெல்லவில்லை.

எதியோப்பியாவின் திக்ரேயின் பகுதிகளில் குண்டுத் தாக்குதல்கள், களவு, மோதல்கள் நேற்று தொடருவதாக திக்ரே மக்களின் விடுதலை முன்னணி தெரிவித்துள்ளது. குறித்த முன்னணியின் தலைவர்களைக் கைப்பற்றுவதற்கு சில நாள்களே உள்ளதாக எதியோப்பிய அரசாங்கப் படைகள் பிரகடனப்படுத்தியதைத் தொடர்ந்தே மேற்குறித்த கருத்தை முன்னணி வெளிப்படுத்தியுள்ளது.

நாட்டில் மேலும் 326 பேருக்கு கொரோனா வைரஸ் தொற்று உறுதிப்படுத்தப்பட்டுள்ளதாகவும் இவர்களுள் 172 பேர் பேலியகொடை கொத்தணியைச் சேர்ந்தவர்கள் எனவும் சுகாதாரப் பிரிவினர் அறிவித்துள்ளனர். இதனையடுத்து, கொரோனா வைரஸ் தொற்றாளர்களின் எண்ணிக்கை 28,203ஆக அதிகரித்துள்ளது. இதேவேளை, குணமடைந்தவர்களின் எண்ணிக்கை 20,804ஆக அதிகரித்துள்ளது.