இவ் விதிமுறைகள் விவசாய பயிர்களை பாதுகாப்பதையும், விவசாயிகளுக்கும் கால்நடை உரிமையாளர்களுக்கும் இடையிலான முரண்பாடுகளைத் தவிர்ப்பதையும் முக்கிய நோக்கமாகக் கொண்டுள்ளன.
அந்தச் சட்டத்தின் அடிப்படையில், கமக்கார அமைப்பின் முன் அனுமதியின்றி வயல் நிலங்களில் கால்நடைகளை விடுதல் முற்றாகத் தடை செய்யப்பட்டுள்ளது.
பயிர்கள் சேதமடையாமல் பாதுகாப்பதற்காக, கால்நடைகள் கட்டுப்படுத்தப்பட வேண்டும் என்பதும் சட்டத்தின் முக்கியக் கோரிக்கையாகும்.
அனுமதியின்றி கால்நடைகளை வயல் நிலங்களில் மேய விடுவது (உள்நுழைதல்) ஒரு குற்றமாகக் கருதப்படுவதுடன், அதற்கெதிராக சட்ட நடவடிக்கைகள் மேற்கொள்ளப்படலாம்.
மேலும், 2011 ஆம் ஆண்டு 46 ஆம் இலக்க கமநல அபிவிருத்தி (திருத்தச்) சட்டத்தினால் திருத்தம் செய்யப்பட்ட 2000 ஆம் ஆண்டு 46 ஆம் இலக்க கமநல அபிவிருத்திச் சட்டத்தின் உட்பிரிவு 86, 1(ஏ) இன் பிரகாரம் பயிற்செய்கை போக கூட்டங்களில் கமக்கார அமைப்பு அல்லது அதனால் நியமிக்கப்பட்ட பிரதிநிதி (வட்டவிதானை/கால்நடை பிடிப்பாளர்) வழங்கும் அறிவுறுத்தல்களை விவசாயிகள் மற்றும் கால்நடை உரிமையாளர்கள் கட்டாயமாகக் கடைப்பிடிக்க வேண்டும் என சட்டம் வலியுறுத்துகிறது.
கால்நடைகளினால் பயிர்களுக்கு சேதம் ஏற்பட்டால், அதற்கான முழுப் பொறுப்பும் உரிய கால்நடை உரிமையாளரையே சாரும்.
கால்நடைகளை முறையாக கட்டுப்படுத்தத் தவறியமையால் பயிருக்கு சேதம் விளைவிக்கப்பட்டால், குற்றம் செய்தவருக்கு எதிராக சட்டப்படி நடவடிக்கை எடுக்கப்படும்.
கமநல சேவை நிலையத்தின் அறிவுறுத்தல்களுக்கு முரணாக செயல்படுதல் தண்டனைக்குரிய குற்றமாகும். சட்ட மீறல்கள் பதிவுசெய்யப்பட்டால், அவை தொடர்பாக 03 மாதங்களுக்குள் சட்ட நடவடிக்கைகள் மேற்கொள்ளப்படலாம்.
மேலும், பயிர்கள், நீர் வளங்கள் மற்றும் பொது சொத்துகளுக்கு ஏற்பட்ட சேதங்களுக்கு உரிய இழப்பீடு வசூலிக்கப்படும். மீறல்கள் தொடர்ந்து நடைபெறும் பட்சத்தில், மேலதிக சட்ட நடவடிக்கைகளும் எடுக்கப்படலாம்.
இந்தச் சட்ட விதிமுறைகள் விவசாயிகள் மட்டுமன்றி, கால்நடை உரிமையாளர்கள் அனைவருக்கும் கட்டாயமாகும். அனைவரும் ஒத்துழைப்புடன் செயல்படுதல் மூலம் மட்டுமே விவசாய நிலங்களின் பாதுகாப்பும், கிராமப்புற அமைதியும் உறுதிப்படுத்தப்படலாம்.
இந்த அறிவிப்பு வெளியான நாளிலிருந்து அமுலுக்கு வரும் என்பதுடன், சட்டத்தை மீறுவோருக்கு அபராதம் மற்றும் பிற தண்டனைகள் விதிக்கப்படலாம்.
இவ்விதிமுறைகளை நடைமுறைப்படுத்துவதற்கான பொறுப்பு கமநல அபிவிருத்தி உத்தியோகத்தர், கிராம சேவையாளர், கமக்கார அமைப்பு தலைவர், கமக்கார அமைப்பு செயலாளர், காவல் துறை மற்றும் உரிய அரச அதிகாரிகள் ஆகியோருக்கு வழங்கப்பட்டுள்ளது.
மேலும் மேற்குறித்த கமநல அபிவிருத்திச் சட்டத்தின் 92 ஆம் பிரிவின் பிரகாரம், கால்நடைகளை கட்டுப்படுத்தும் அதிகாரம் கமக்கார அமைப்பிற்கோ, அதனால் நியமிக்கப்பட்ட பிரதிநிதிக்கோ, காணி உரிமையாளருக்கோ அல்லது குத்தகைக்காரருக்கோ கையளிக்கப்பட்டுள்ளது.
எனவே, கமநல சேவை நிலையத்தின் அறிவுறுத்தல்களுக்கு அமைவாக அனைவரும் பொறுப்புடன் செயல்படுதல் அவசியமாகும்.