இந்தப் புதிய பரிந்துரையின் கீழ், இலங்கையிலிருந்து அமெரிக்காவிற்கு ஏற்றுமதி செய்யப்படும் பொருட்களுக்கு 12.5% கூடுதல் வரி விதிக்கப்படும்; ஏனெனில், கட்டாய உழைப்பின் மூலம் பெறப்படும் பொருட்களின் இறக்குமதிக்கு இலங்கை எவ்விதத் தடையையும் விதிக்கவில்லை அல்லது அத்தகைய தடைகளைத் திறம்பட நடைமுறைப்படுத்தவில்லை.
பரஸ்பர வர்த்தக ஒப்பந்தங்கள் மூலம் இத்தகைய இறக்குமதிகளுக்குப் பகுதி அளவிலான தடைகளை விதித்துள்ள அல்லது தடைகளை விதிக்க ஒப்புக்கொண்டுள்ள நாடுகளுக்கு 10% என்ற குறைவான கூடுதல் வரியை விதிக்க அமெரிக்க வர்த்தகப் பிரதிநிதி அலுவலகம் பரிந்துரைத்துள்ளது. ஆனால், இலங்கை உள்ளிட்ட ஏனைய அனைத்து நாடுகளுக்கும் 12.5% என்ற உயர்ந்த வரி விகிதமே விதிக்கப்படவுள்ளது. எனினும், ஆடை மற்றும் ஜவுளி இறக்குமதிகளைக் குறைந்த வரி விகிதத்தில் அனுமதிக்கும் வகையில் ஒரு சிறப்பு ஜவுளி நடைமுறையும் (Special textile mechanism) பரிந்துரைக்கப்பட்டுள்ளது.
பாதிக்கப்பட்ட பொருளாதார நாடுகளின் பட்டியலில் இலங்கையுடன் சேர்த்து சீனா, இந்தியா, ஜப்பான், தென்கொரியா, ஐக்கிய இராச்சியம் (UK), ஐரோப்பிய ஒன்றியம் (EU), கனடா, மெக்சிகோ, ஆஸ்திரேலியா, பிரேசில் மற்றும் தென்னாப்பிரிக்கா போன்ற முக்கிய வர்த்தகப் பங்காளிகளும் அடங்குவர்.
கட்டாய உழைப்புப் பொருட்களுக்குத் தடை விதிக்கத் தவறியதாக மொத்தம் 54 நாடுகள் கண்டறியப்பட்டுள்ளன. அதேவேளையில், கனடா, மெக்சிகோ, பாகிஸ்தான், இந்தோனேசியா, ஈக்வடார் மற்றும் ஐரோப்பிய ஒன்றியம் ஆகிய ஆறு நாடுகள், தங்களிடம் ஏற்கனவே உள்ள தடைகளைத் திறம்பட நடைமுறைப்படுத்தத் தவறியதாகக் சுட்டிக்காட்டப்பட்டுள்ளன.
இது குறித்து அமெரிக்க வர்த்தகப் பிரதிநிதி ஜேமிசன் கிரீர் (Jamieson Greer) கூறுகையில்,
“வர்த்தகப் பங்காளிகள் கட்டாய உழைப்பு இறக்குமதிகளைத் தடுக்கத் தவறுவது, அமெரிக்கத் தொழிலாளர்கள் உலகளவில் ஒரு சமமற்ற களத்தில் போட்டியிட வேண்டிய கட்டாயச் சூழலை உருவாக்குகிறது. அமெரிக்கா இனிமேலும் இந்த வேறுபாட்டைப் பொறுத்துக்கொள்ளாது,” என்று தெரிவித்துள்ளார்.
இந்தப் பரிந்துரைக்கப்பட்ட நடவடிக்கைகள் குறித்த பொது விசாரணைகள் 2026 ஜூலை 7 அன்று நடைபெறத் திட்டமிடப்பட்டுள்ளது. இது தொடர்பான எழுத்துப்பூர்வ கருத்துக்களை ஜூலை 6ஆம் திகதிக்குள்ளும், விசாரணைகளில் நேரில் முன்னிலையாவதற்கான கோரிக்கைகளை ஜூன் 22ஆம் திகதிக்குள்ளும் சமர்ப்பிக்க வேண்டும் என அறிவிக்கப்பட்டுள்ளது.