விமான நிலையம் வந்தடைந்த பிரதமர் மோடியை, தமிழக முதலமைச்சர் விஜய் நேரில் சென்று உற்சாகமாக வரவேற்றார். அதனைத் தொடர்ந்து, அமைச்சர்கள், அதிமுக பொதுச்செயலாளர் எடப்பாடி பழனிசாமி, பாஜக தலைவர் நயினார் நாகேந்திரன் மற்றும் பல முக்கியப் பிரமுகர்கள் தங்களது வரவேற்பைத் தெரிவித்தனர்.
புதிய மெட்ரோ ரயில் சேவைத் தொடக்கம்
இதனைத் தொடர்ந்து, போரூர் மெட்ரோ ரயில் நிலையம் சென்ற பிரதமர் மோடியும், முதலமைச்சர் விஜய்யும் அங்கு நேரில் ஆய்வு செய்தனர். அப்போது, மெட்ரோ ரயில் சேவையின் செயல்பாடுகள் குறித்துப் பிரதமர் மோடி விரிவாகக் கேட்டறிந்தார்.
பின்னர், ரூ.750 கோடி செலவில் புதிதாக அமைக்கப்பட்டுள்ள பூந்தமல்லி – வடபழனி மெட்ரோ ரயில் வழித்தடத்தைப் பிரதமர் மோடியும், முதலமைச்சர் விஜய்யும் இணைந்து கொடியசைத்துத் தொடங்கி வைத்தனர். இந்த புதிய வழித்தடத்தில் முதற்கட்டமாக 11 நிலையங்களில் மெட்ரோ ரயில்கள் நின்று செல்லும்.
ரயிலில் சுவாரஸ்யமான பயணம்
தொடர்ந்து, பிரதமர் மோடி யுபிஐ (UPI) மூலம் டிஜிட்டல் முறையில் பணம் செலுத்தித் தன் கைகளால் மெட்ரோ ரயில் டிக்கெட்டைப் பெற்றார். அதன்பிறகு, போரூர் மெட்ரோ ரயில் நிலையத்தில் இருந்து பூந்தமல்லி மெட்ரோ ரயில் நிலையம் வரை இருவரும் மெட்ரோ ரயிலில் இணைந்து பயணம் செய்தனர். இந்தப் பயணத்தின் போது, மெட்ரோ திட்டப் பணிகள் குறித்துப் பிரதமர் மோடியிடம் துறைசார் அதிகாரிகள் விளக்கமளித்தனர்.
முக்கியத் திட்டங்களுக்கு அடிக்கல் நாட்டு விழா
மெட்ரோ ரயில் பயணத்தைத் தொடர்ந்து, ரூ.3,700 கோடி மதிப்பிலான முக்கியத் தேசிய நெடுஞ்சாலைத் திட்டங்களுக்குப் பிரதமர் மோடி அடிக்கல் நாட்டியதுடன், நிறைவடைந்த திட்டங்களையும் நாட்டுக்கு அர்ப்பணித்தார். மேலும், ரூ.750 கோடி மதிப்பில் ரயில்வே உள்கட்டமைப்புத் திட்டங்களையும் அவர் தொடங்கி வைத்தார்.
அதுமட்டுமின்றி, தமிழகத்தில் கடல்சார் உள்கட்டமைப்பை வலுப்படுத்தவும், சரக்கு கையாளும் திறனை அதிகரிக்கவும் சென்னை துறைமுகத்தில் நான்கு புதிய உள்கட்டமைப்புத் திட்டங்களையும் அவர் திறந்து வைத்தார். பிரதமரின் இந்தப் பாதுகாப்புமிக்க வருகையையொட்டி, சென்னை முழுவதும் பலத்த பாதுகாப்பு ஏற்பாடுகள் செய்யப்பட்டுள்ளன.